లైకా కెమెరాతో భారత మార్కెట్లోకి షావోమీ 17టీ.. ధర, ఫీచర్లు ఇవే!

ప్రముఖ స్మార్ట్‌ఫోన్ బ్రాండ్ షావోమీ తన సరికొత్త మోడల్ ‘షావోమీ 17T’ ఫోన్‌ను భారత మార్కెట్లో విడుదల చేసింది. ప్రసిద్ధ లైకా కెమెరా సిస్టమ్‌తో వస్తున్న ఈ ప్రీమియం ఫోన్ ప్రారంభ ధరను రూ.59,999గా సంస్థ నిర్ణయించింది. జూన్ 10వ తేదీ మధ్యాహ్నం 12 గంటల నుంచి అమెజాన్, ఎంఐ అధికారిక వెబ్‌సైట్, షావోమీ రిటైల్ స్టోర్లలో దీని అమ్మకాలు ప్రారంభం కానున్నాయి. ఇందులో 12జీబీ ర్యామ్ + 256జీబీ స్టోరేజ్, అలాగే 12జీబీ ర్యామ్ + 512జీబీ స్టోరేజ్ అనే రెండు వేరియంట్లు ఉన్నాయి. టాప్ వేరియంట్ ధర రూ.64,999. బ్యాంక్ ఆఫర్ల ద్వారా కొనుగోలుదారులకు రూ.5,000 ఇన్‌స్టంట్ డిస్కౌంట్ లభించనుంది. దీంతో ఈ ఫోన్ రూ.54,999కే లభిస్తుంది.

ఈ స్మార్ట్‌ఫోన్ ప్రధాన ఆకర్షణ దీని కెమెరా అనే చెప్పాలి. లైకాతో కలిసి సంయుక్తంగా రూపొందించిన ట్రిపుల్ కెమెరా సెటప్‌ను ఇందులో అమర్చారు. దీని వెనుక భాగంలో ఓఐఎస్ సదుపాయం గల 50 మెగాపిక్సెల్ ప్రధాన కెమెరాతో పాటు, 5ఎక్స్ పెరిస్కోప్ టెలిఫొటో లెన్స్‌ను కూడా ఇచ్చారు. షావోమీ టీ-సిరీస్ ఫోన్లలో ఇలాంటి అడ్వాన్స్‌డ్ జూమ్ హార్డ్‌వేర్ ఇవ్వడం ఇదే మొదటిసారి. ఫొటో తీసే ముందు సెకన్ల కాలాన్ని కూడా రికార్డ్ చేసే ‘లైకా లైవ్ మూమెంట్’, అలాగే అద్భుతమైన పోర్ట్రెయిట్ ఫొటోల కోసం ‘లైకా లైవ్ పోర్ట్రెయిట్’ అనే రెండు కొత్త మోడ్‌లను ఇందులో పరిచయం చేశారు.

ఈ ఫోన్‌లో 6.59 అంగుళాల 1.5కే అమోలెడ్ డిస్‌ప్లేను ఇచ్చారు. ఇది 120హెర్ట్జ్ రిఫ్రెష్ రేట్, 3500 నిట్స్ గరిష్ఠ బ్రైట్‌నెస్‌తో పనిచేస్తుంది. కళ్లకు రక్షణగా ఉండేలా ఈ స్క్రీన్‌కు టీయూవీ రైన్‌లాండ్ ఐ-కేర్ సర్టిఫికేషన్ ఉంది. ఫోన్ ఎక్కువ సమయం పనిచేసేందుకు వీలుగా ఇందులో 6500mAh సిలికాన్-కార్బన్ బ్యాటరీని అమర్చారు. దీనితోపాటు 67 వాట్ల హైపర్‌ఛార్జ్ ఫాస్ట్ ఛార్జింగ్ సదుపాయం కూడా ఉంది. ఈ స్మార్ట్‌ఫోన్ సరికొత్త షావోమీ హైపర్‌ఓఎస్‌తో పనిచేస్తుంది. ఇందులో గూగుల్ జెమినీ, సర్కిల్ టు సెర్చ్, షావోమీ హైపర్ ఏఐ వంటి అత్యాధునిక ఫీచర్లు ఇన్-బిల్ట్‌గా వస్తున్నాయి. ఈ ఫోన్ వయొలెట్, బ్లూ, బ్లాక్ రంగుల్లో లభిస్తుంది.

లాంచ్ ఆఫర్లలో భాగంగా క్రెడిట్ కార్డ్ ఈఎంఐ లావాదేవీలపై రూ.5,000 ముందస్తు బ్యాంక్ డిస్కౌంట్ ఉంటుంది. లేదా దీనికి బదులుగా రూ.5,000 ఎక్స్ఛేంజ్ బోనస్‌ను కూడా ఎంచుకోవచ్చు. అయితే ఈ రెండు ఆఫర్లను ఒకేసారి క్లబ్ చేయడానికి వీల్లేదు. కొత్త ఫోన్ కొన్నవారికి ఒక సంవత్సరం పాటు 60 శాతం వరకు అష్యూర్డ్ బైబ్యాక్ గ్యారెంటీ లభిస్తుంది. దీంతో పాటు గూగుల్ ఏఐ ప్రో, యూట్యూబ్ ప్రీమియం, జియోహాట్‌స్టార్, స్పోటిఫై ప్రీమియం వంటి యాప్‌ల మూడు నుంచి నాలుగు నెలల ఉచిత ట్రయల్స్ ఇస్తున్నారు. అలాగే గూగుల్ జెమినీ ప్రో ద్వారా 5000జీబీ క్లౌడ్ స్టోరేజ్ కూడా ఉచితంగా లభించనుంది.